Біздің бұған дейін көтерген біраз ойларымызды Қасым-Жомарт мырза айтып тастады. Президенттік сайлаудан кейін – 2019 жылы әлеуметтік желіде құрылған Азаматтық қоғам коалициясы белсенділеріне «жабылған облыстарды қайтару мәселесін көтеріңдер» деп шақырып едік. Бұл ұсынысты «ДАТ»-қа берген бір сұхбатымда да айттым. Енді, міне, президент Тоқаевтың өзі айтып отыр.
Дегенмен, біздің халық енді той жасап, әбігер болады. Не деген мінезсіз ел?! Облыстардың қайтадан ашылуымен проблема сарқылып бітпейді ғой: билікке қоятын талаптың акцентін ауыстырып алуға болмайды.
Бұл бастамалар елде жүруі тиіс реформаның бастысы деп айта алмаймын. Бастысы – сайлаулар туралы және саяси партияларды тіркеу заңнамаларын халық талабына сай өзгерту. Бұл тұрғыда айтарлықтай ілгерілеу көрінбейді. Тиісті заңдарды сылап-сипаумен іс бітпейді.
Президент Тоқаев әлі де тартыншақтап отыр. Оның бұл бастамалары жылқының суды иіскеп ішетінін есіме түсірді. Реформалар батыл әрі шұғыл жасалуы керек. Өзгерістерді созбалақтатуға болмайды. Бұл жөніндегі ойларымды «ДАТ»-қа беретін кезекті интервьюде толығырақ айтармын.
Әзірге президенттің осы бастамалары іс жүзіне асуын талап етейік. Егер Қасым-Жомарт Тоқаевтың осы бастамалары батыл қадамдармен ұштасар болса, азаматтық қоғам президентті қолдауы қажет деп ойлаймын. Әліптің артын бағайық.
Источник: Издание “DAT”
